Халлааммыт сааскылыы наскыйа сылыйан, кыралыын-улаханныын бу күн уратытык өрө көтөҕүллэн, бэлэмнэнии сүпсүлгэнэ буоллубут. Баччаларга өрүү буоларыныы уот линиятыгар өрөмүөн ыытыллар буолан, уоппут суох😅

Сып-сап туттан дизель холбонно, аппаратура үлэлээтэ, сахалыы соннорун маанымсыйа кэппит эбээлэр, кытыйаҕа алгыстаах алаадьы, хурустаал чорооҥҥо кырылыы көөнньүбүт быыппах, тэлимнэспит былаахтар бэлэмнэр

Бэлэммит!-диэтэрбит даҕаны, тугу эрэ умнубатар ханнык, сыыһа-халты хамсамматах киһи диэн испитигэр долгуйуу оргуйан олорор. Буолумуна, бүгүҥҥү күн чаппандаларга хатыламмат ураты, бу күн нэһилиэк историятыгар киирэр, бүгүн Дьоруой кэлэр!

⭐️⭐️⭐️Андрей Григорьевы билбэт саха киһитэ, Ньурба олохтооҕо суох буолуо, онон эрдэ сурукка тиһиллибити, үгүстүк иһиллибити хатылаан, кини кимин-тугун, дьоруойдуу быһыытын хаттаан билиһиннэрэ барбаппытын баалаамаҥ🙏🏽

⭐️Оскуола чаҕылхай саалатыгар тоҕуоруһа мустубут дьон-сэргэ, оҕо-аймах Дьоруойбутун, эрдэ кини туһунан куйаар ситимигэр, сырдатар эйгэҕэ үгүстүк көрбүппүтүнэн, уруккуттан алтыһар чугас аймах-билэ киһибит кэриэтэ иһирэхтик көрүстүбүт. Кини күн-күбэй ийэтэ Ольга Егоровна 8 сааһыгар диэри Чаппандаҕа улааппыт буолан, Андрей аймахтарыгар Макар Семеновичтаахха оҕо сылдьан үгүстүк кэлэн барарын, манна элбэх киһини кытта билсэн доҕордоһорун кэпсээбитигэр, били долгуйбуппут ааһан хаалла, уолбутун тута уруурҕуу түстүбүт😅

Көрсүһүүбүт атах тэпсэн олорон кэпсэтии быһыытынан ыытылынна. Андрей Николаевиһы кытта олоҕун аргыһа Октябрина Дмитриевна, улахан уоллара Айгылаан сылдьыһаллар. Аҕаларынан олус киэн тутталларын, улахан дьиэ кэргэн халыҥ хаххата, суон дурдата буоларын истиҥник кэпсээтилэр, Айгылаан фокус алыбынан үлүһүйэрин оҕолор сэргээтилэр. Оскуолабыт үөрэнээччилэрэ, олохтоохтор ыйытык биэрээри бэлэмнэнэн кэлбиттэригэр сиһилии хоруйдаан, сүбэ-ама биэртэлээн, бириэмэ элэстэнэн ааспытын өйдөөбөккө да хааллыбыт. Дьоро түгэни үйэтитэн, хас биирдиибит хаартыскаҕа түстүбүт, Андрей Николаевич оскуола түмэлин, бэлэмнэммит быыстапканы көрдө, уһуйаан кырачааннарын көрүстэ.

⭐️ Нэһилиэкпитигэр ыытыллыбыт улахан тэрээһини ыытарга сүрүн күүс буолбут оскуола-саад коллективыгар, үөрэнээччилэргэ дириҥ махталбытын биллэрэбит👏🏼✨Каникул бүтэһик сынньалаҥ күннэрин аахсыбакка, тура тэбинэн киэһэ хойукка диэри көрсүһүү ыытыллар сирин сиэдэрэйдик симээн, сарсыҥҥы үөрэх күнүгэр бэлэмнээн, оҕолору түмэ тардан дьиҥ патриоттуу чаҕылхай холобуру көрдөрдүлэр* 👏🏼👏🏼👏🏼

Дьоруойу көрсүү дьоһун, хатыламмат түгэнин Сайаана Оленова хаартыскаҕа хатаабытын, видеоҕа үйэтиппитин сэргии-сэҥээрэ көрүҥ📸📸📸

Источник: Администрация СП «Чаппандинский наслег»